政情：劉鳴煒再尋香港有心人

由華人置業副主席劉鳴煒做召集人嘅「2011香港精神大使」選舉第二年進行，尋日佢同發起人陳仲尼、梁宏正齊齊出席記招公布詳情。劉鳴煒話選舉冇獎金亦冇獎品，上年七位大使仲要抽時間喺幾個月內去三、四十間學校團體做分享，絕對係關心香港嘅有心人。為咗令更多有心香港人可以將佢哋嘅香港精神同大眾分享，今年不設年齡限制，提名人除咗可用文字提名，仲可以拍短片介紹候選人嘅香港精神故事，相當與時並進。

劉鳴煒話上年冇乜人知佢哋搞乜，有啲機構嘅反應一般，有啲仲會潑冷水，加上全部搞手都係義務性質，所以上年最忙嘅時候，佢差唔多用咗三分一時間搞呢單嘢，但見到活動順利完成，幾辛苦都值得。今年再搞，佢話會吸取經驗做到最好。

陳仲尼同梁宏正都好認同，事關佢哋三個大忙人由去商場派傳單，到陪大使去學校分享，事事親力親為。