政情：袋巾傑冇閂選特首後門
喺○七年特首選舉出嚟陪跑、啱啱做咗公文袋黨魁嘅袋巾傑，會唔會再戰二○一二年特首選舉呢？袋巾傑尋日顧左右而言他，話要先同其他泛民商討以乜嘢態度參與特首選舉，再考慮會唔會參選。咦！睇嚟冇閂後門喎！
面對追問，袋巾傑黨友首先護駕，話公文袋從來冇要黨魁選特首嘅慣例，乜都要等黨集體決定。袋巾傑更加話希望先主動同各泛民政黨討論參與特首選舉嘅意義，有需要再集體選出候選人，唔會依家就話參選。咁幾時有決定？佢話愈快愈好，只係大家未坐低傾。
當然，即使袋巾傑想再出嚟陪跑，都未必成功，事關上屆白鴿黨捧咗佢上神枱後，不特止選票一去不回頭，仲要成日畀公文袋鬧番轉頭。嚟緊袋巾傑想白鴿黨支持，湊夠一百五十個選委提名拎入場券，睇嚟都好難囉！