政情：張建宗放風靠嚇挽交津

政府推出嘅鼓勵就業交通津貼計劃搞到一鑊泡，勞工及福利局局長張建宗曾一改「好傾局長」嘅態度，多次強調已退無可退，寸步不讓，直至職工盟嘅議員李卓人提出終止辯論嘅議案，除泛民主派外，仲有唔少建制派嘅議員支持，勢將否決交津計劃，逼得張建宗連日嚟節節敗退，作出三大讓步，搞到自己遍體鱗傷，終於湊夠最少二十九票支持，成功保住交津唔觸礁。

今次談判峰迴路轉，最後點解可以挽回劣勢？除咗靠張建宗同建制派密斟大打悲情牌外，傳聞仲有一個關鍵環節。

話說日前唔同政黨開始收到消息，希望佢哋三思唔好推翻交津。消息明言，煲呔曾只剩低唔夠兩年任期，加上最棘手嘅政改已過，如果畀李卓人嘅押後議案成功通過，唔排除煲呔曾把心一橫將交津打入冷宮，喺呢屆政府任期內永不重提，變相導致低收入家庭要捱多兩年苦。

另外，亦有傳聞指張建宗前晚約見多個建制派代表時，語帶無奈咁講咗句：「今次真係剝晒我啲衫，連呔都差啲畀人剝埋。」有與會人士認為，當中可能語帶暗示，指今次僵局係因為煲呔曾企硬，就算再逼張建宗都唔會有改進，所以既然當局有兩大讓步，就惟有收貨以免得個吉。