政情：邱騰華縮骨拋爐博大霧

作為一個負責任嘅政府，喺推行政策時，就算係一啲具爭議性嘅議題，都要敢於面對公眾，偏偏有啲政府高官就閃閃縮縮。

仲記得舊年八月，政府一次過公布包括財爺鬍鬚曾嗰「三招十四式」打擊炒樓手段、副局政助薪金檢討、港台顧問委員會名單，單單新鮮單單甘。去到十二月，立法會公布梁展文事件調查報告，政府又同時安排政制及內地事務局局長「林公公」林瑞麟出嚟，公布廢除外國領事可以喺功能組別投票嘅荒謬安排，同日再公布埋證監會行政總裁韋奕禮提前請辭，目的原來又係攤薄傳媒同公眾嘅注意力，等自己冇咁樣衰。

同張建宗蠱惑夾計

尋日就輪到環境局局長邱騰華出呢招，佢趁住「鼓勵就業交通津貼計劃」搞到㷫合合，走出嚟公布焚化爐落戶石鼓洲人工島。需知道焚化爐選址一向都係敏感議題，其他時間公布肯定畀人㩒住砌，呢單嘢好可能喺禮拜二嘅行政會議通過，佢喺「交津」呢個全港基層打工仔都關心嘅議題炒熱之後先公布，即時收到冷處理嘅效果。

邱騰華嘅陰招其實有迹可尋，佢同勞工及福利局局長張建宗尋日都突然通知傳媒，會分別出嚟會見記者，兩位局長講嘅都唔係小事，但佢哋見記者嘅時間相差只得四十五分鐘，先出嚟嘅邱騰華自然就畀稍後出嚟嘅張建宗盡蓋風頭，呢個現象當然亦喺佢計算之內啦！

一單「交津」啫，有冇咁大效果呀？講得啱，如果只得一單「交津」，邱騰華嘅如意算盤當然打唔響啦，但唔好唔記得，全城哀慟嘅菲律賓人質慘劇死因研訊依家進行得如火如荼、「賭王」何鴻燊嘅家族糾紛又日日都有新聞，簡直就係炮火連天，亂到七彩，邱騰華喺咁嘅環境下拋焚化爐選址出嚟，擺明係博亂，想藉此淡化件事，博鬧少啲啫！認真縮骨！