政情：蔡加讚汪圓圓十指緊扣逛ifc

「玩具大王」蔡志明喜事一單接一單，繼長女蔡加敏生咗一對老虎仔後，元宵佳節前夕，孻仔蔡加讚（Karson）被直擊同模特兒兼演員女友汪圓圓十指緊扣喺中環ifc拍拖，但Karson有啲忐忑，事關佢喺嚟緊星期日先至帶女友首次見爸爸。

Karson被視為鑽石筍盤，佢同甄子丹姨仔汪圓圓識咗兩個月，但正式拍拖就仲未滿月，因為剛萌芽，佢陪咗屋企人去澳洲過年，身在澳洲心在港，除咗掛住家姐剛出世嘅孖B之外，亦掛住圓圓。

尋日六點幾收工，佢即刻同女友去拍拖，仲去買Le Gouter Bernardaud法式甜品，圓圓仲陪鍾意影相嘅加讚去Leica相機舖行咗個圈添。兩人剛開始時，Karson將女友介紹畀媽咪認識，蔡太大讚圓圓夠純品，至於圓圓嘅姐姐汪詩詩亦對加讚大有好感，令呢段感情發展得更順利。