政情：搞搞政：交津困局玩殘張建宗

勞工及福利局局長張建宗呢幾日盡最後努力，喺各大黨派中周旋，希望財委會可以通過交通津貼撥款案，避免職工盟李卓人提出嘅終止辯論動議打亂陣腳。尋日，佢又同勞工處處長卓永興一早就去咗立法會游說白鴿黨，情勢緊急，張建宗一舉一動都招來大批記者，但佢唔想多講，仲一再出招想突圍而出，最終都以失敗告終，「膠樽」（交津）之困似乎真係唔易解。

其實，白鴿黨同佢開會後，表態堅決支持終止辯論動議。大家於是好關心張建宗仲有乜新招呢？不過，張建宗好迴避，只重複一啲聽到悶嘅答案後就想鬆人，只係部竟然喺呢個時候關門，結果佢無奈要面對傳媒，答多三條問題先走得。現場消息透露，張建宗隨員其實早就叫司機一收到電話就即時將車駛去門口，打算以九秒九速度閃人o架，只係估唔到連部都添煩添亂啫。

到咗下晝，佢又返嚟立法會，今次雖然準備充分，行咗立法會主席專用通道走人，又搵人撳定部等佢，不過，關門時差啲夾到電台記者支咪。搭都咁狼狽，交津嘅撥款案真係好難樂觀噃。