政情：田少撐導遊幫何栢霆拉票

導遊「阿蓉」同內地遊客打完交後，旅遊業風雲四起，現任業界立法會議員謝偉俊同疑似挑戰者旅遊業議會主席胡兆英暗鬥連場外，身兼旅遊發展局主席嘅富貴黨榮譽主席田北俊尋日出席一個旅遊界講座時都出招，話件事未必錯在導遊，挺完導遊，再挺中小型旅行社，佢態度逆轉，據講唔多唔少同富貴黨已部署明年派出前旅遊業議會主席何栢霆出戰立法會旅遊界有關。

田少早前曾狠批劏客導遊影衰香港人，尋日卻話內地客參加「八千蚊五個人嚟港」嘅團，可以得到乜嘢服務，心中有數啦，唔應該欺負帶團導遊。跟住又為業界講好說話，佢忽然向全港導遊同中小型旅行社施冧功，點解呢？

○八年一役，旅遊界約有一千三百張公司票，當中以中小型旅行社為主，本身係大行捷旅假期董事總經理嘅何栢霆若然明年出戰，梗係要爭呢批票源喇，田少提早冧定選民，謝偉俊就遇到對手喇。