政情：李慧琼識歎去畫廊食晏
城中有好多別致嘅食肆，建仔立法會議員李慧琼（Starry）近日發現咗一間集藝術與佳餚於一身嘅餐廳，就係銅鑼灣開平道一號Cubus三樓嘅「方圓藝廊」咖啡館。Starry大讚間餐廳食物質素夠水準，而且環境寧靜兼有藝術品欣賞，約朋友食飯傾偈，夠晒寧靜，加上餐廳好近佢間會計師行，食晏夠就腳，就算喺中環過去都一樣方便。
「方圓藝廊」咖啡館原本真係一間畫廊，後來畫廊老闆與朋友合作改為一間藝廊餐廳，除咗出售藝術品外，仲為客人提供有機食品，好似Pasta（意大利麵）配搭嘅用料種類多樣化又新鮮，包括香草、蘑菇、黑松露、蜆肉、櫻桃茄、帶子、意大利青瓜等，正合晒Starry心意。餐廳早前只供應午餐及下午茶，最近已做埋晚市。
李慧琼幫襯「方圓藝廊」，都不忘欣賞餐廳內嘅藝術畫作。
煙三文魚火箭菜忌廉扁麵，係十分清新嘅選擇。