政情：光哥答問遭狂轟 同孫公難兄難弟

立法會政府帳目委員會尋日發表報告，既狠批教育局局長監管直資不力，又就戒毒中心管理問題鬧保安局局長，孫明揚同李少光畀人遺憾仲未拆掂，轉過頭又因為立法會議員提咗個青少年性罪行嘅口頭質詢，議員不滿得光哥一人應戰，開行火力狂轟，結果光哥被鬧到體無完膚，不在場嘅孫公都唔好過，真正係官場難兄難弟。

孫公缺席被斥混帳

尋日個口頭質詢係教育界議員張文光提出嘅，佢提到過去一年校園非禮案大增三成七，跟住問政府點樣防範青少年性罪行，呢個問題可以話兩個政策局都有份，不過，直資問題成為尋日帳委會報告出擊重點，唔知係咪咁，只由光哥一個人回應呢項口頭質詢，佢先係拋咗一堆警方偵查呢類案件嘅數字，又話警方鼓勵報案得法，跟住仲越俎代庖，答埋政府喺教育層面做咗幾多嘢、發咗幾多指引等。

點知張文光好唔滿意，嚴斥本港性犯罪年輕化同性教育嚴重脫節有關，孫公點可以當唔關自己事，其他議員亦質疑孫公唔出席個會，有人直斥「混帳」，係咪求其搵一個局長就敷衍立法會？光哥為咗平息眾怒，惟有幫孫公孭晒上身，繼續撐落去。

講講吓，佢仲搞gag打圓場，話青少年性罪行呢個問題唔止係保安嘅問題，仲係社會嘅問題，企圖以社會問題蒙混呢個更係教育問題，不過，佢嘅口脗似足粵語殘片對白：「都係社會嘅錯！」搞到本嚟好㷫嘅議員都忍唔住哄堂大笑。

雖然光哥瞓晒身抵擋，不過班議員都係眾怒難消，對不在場嘅孫公連珠炮發。結果光哥雖然捱咗義氣，但問責效用就好麻麻喇。