Sun世代：女人要靚一定要飲湯

蔡敏思的美容事業搞得有聲有色，又靚又fit的外形更加令人艷羨，她亦樂意大談扮靚心得，除了靠密密做facial，飲湯水、做運動、保持身心開朗和健康生活習慣等，始終是保持靚樣的不二法門，女士們緊記！

少食多餐戒鹹

「阿媽教落，女人要靚，一定要飲湯！」問蔡敏思的護膚keep fit秘訣，她首先推介媽咪湯水，然後道出健康生活習慣「一大籮」：「個個禮拜做facial同treatment一次；早睡早起，我朝早六點半就起身、十點半就瞓；每日飲八杯暖水；每日做十五分鐘伸展運動；少食多餐；避免食味精或鹹嘢……」要靚果然「唔懶得」。

保持心境開朗亦是秘訣之一：「壓力可以令人成長，但太辛苦就要減壓，我會瞓低做吓treatment。」雖然篤信佛教，但亦會翻看其他宗教或心理書籍，平衡一下。而除了發展業務，她亦落力做慈善，為癌症基金、長者安居服務協會、獨居老人協會等籌款，回饋社會。

工作以外，她參與多項會務：「自從入咗潮州商會後，又參加咗其他會，圈子擴大咗，識多咗好多朋友。」不過，事務再忙，已為人母的她都是以家庭為重：「一路都好多謝老公、媽咪同個女嘅支持。」一放假，會帶囡囡郊遊和做義工。她說女兒有其真傳，「同學仔送化妝品畀佢，自己已攞嚟扮靚。」她希望女兒長大承繼業務。而公司為男士美容打響名堂，以為她老公該是「長期客仔」，她卻妙答：「生日畀佢做、過年畀佢做……佢唔使做咁多，我覺得佢已經夠靚喇。」