政情：M+新行政總監當黑拗柴
西九文化區管理局高層一走再走，坊間已經有唔少揣測，尋日西九一眾高層同傳媒茶敍，新上任嘅M+行政總監李立偉卻帶傷上陣，原來佢農曆新年前拗柴。前行政總裁謝卓飛告病辭職，履新一個月嘅李立偉又喺街度跣親腳，雖然話兩個禮拜左右就會冇事，但西九風水之說睇怕又會再起。
履新一個月嘅李立偉尋日話，佢享受壓力，亦明白大家對西九抱好大期望，所以有晒準備。身負發展M+重任嘅李立偉透露，計劃成立有十一位策展人嘅十五人小組，將M+打造得賓至如歸，即使依家未有場地，佢都好自信咁話以前試過發展冇建築物嘅博物館，總之滿腹願景、計劃，希望大計有始有終啦！
李立偉行動不便坐喺度，其他西九總監級人物傍住佢，嚟個眾星拱月。