政情：周一鑊懶見中醫藥業界

問責高官掛名問責，出席立法會等政治味十足嘅工作卻經常搵低級公務員做箭靶。《中醫藥條例》規定中成藥未註冊就唔可以售賣，條文實施咗兩個幾月，家吓仍有五千幾種中成藥註唔到冊、冇得賣。中醫藥業界望到頸都長，尋日終於可以喺立法會衞生事務委員會嘅特別會議呻苦，點知食衞局冇一個官員露面，最高級嗰個官方代表只係衞生署助理署長（中醫藥）林文健，聽講佢仲未坐正，就要為周一鑊擋煞。

尋日有二十幾個中醫團體齊集立法會，但高官卻冇晒影，一眾議員同業界都好失望。議員梁美芬話食衞局冇人嚟，業界等於「向住空氣講嘢」；潘佩璆更批評周一鑊連聽意見都費事聽，唔尊重議員；鄭家富則指食衞局矮化立法機關，「唔畀面公眾聲音」；亦有議員向當局表示遺憾，仲決定經內會向政府高層插佢。

中藥註冊涉及好多問題，更可能導致好多家傳戶曉嘅老字號可能從此消失，局方點能夠唔重視？