政情：搞搞政：阿Paul梁君彥誠信鬥一番

翻版阿珍事件搞出高官涉兇議員事件，旅遊界代表謝偉俊（Paul）指控商務及經濟發展局局長劉吳惠蘭（Rita）威脅佢嘅政治前途，不過Rita堅決否認。事後政壇一輪搜尋、佐證，搵嚟搵去只有梁君彥一個人目擊多少，件事亦冇乜結論，喺你有你講、佢有佢講下，政圈人士就話，最後都係睇阿Paul同梁君彥邊個可信啲。

經濟動力尋日同傳媒舉行新年聚會，梁劉柔芬冇出席，開席前，關鍵證人梁君彥畀林健鋒（Jeffrey）攞嚟講笑，Jeffrey話：「你坐定定呀，費事你行開咗，我講啲嘢又死無對證呀！」惹得大家哈哈笑，梁君彥呢個證人更加走唔甩。

講到年底嘅區議會選舉，經濟動力都計劃派約十人出戰，Jeffrey更不忘暗寸近期高調復出嘅富貴黨榮譽主席田北俊，話經濟動力絕對唔會好似富貴黨咁派叉燒飯，聲言落區了解市民需要，再搞講座幫佢哋解決難題，比派飯嚟得更實際同直接喎。不過，如果經濟動力只係齋talk、乜都唔派，會唔會真係吸到選票呢？