政情：毓民耍虛招狙擊KK

高調退出社民連、另搞「人民力量」嘅黃毓民同其追隨者，揚言要狙擊部分泛民政黨，毓民更信誓旦旦咁話會親自招呼喺政改投贊成票嘅民協馮檢基（KK）。尋日KK明言，毓民已經喺區內動作多多，甚至左右夾擊民協成員同派傳單抹黑，好似打定告急牌咁。而毓民方面雖然喺深水埗一帶豎晒街牌、開埋兩個辦事處造勢，不過，我哋明查暗訪發現，毓民喺事件中玩掩眼法，真正披甲上陣狙擊KK嘅應該係毓民嫡系徒弟「滷味男」錢偉洛至真。講嚟講去，佢哋雙方似乎都係耍緊虛招。

KK打定告急牌 四無應戰

據悉，年底會舉行區議會選舉嘅李鄭屋選區，本來一直都掛起滷味男同「維園阿哥」任亮憲嘅街板，任因涉嫌非禮同強姦，政治前景暗淡，毓民先落該區嗌咪造勢，但了解內情嘅人就話，毓民此舉只不過係用「狙擊馮檢基」呢個gimmick，谷高自己同滷味男嘅人氣，佢做軍師就會，挽袖落場選嘅機會唔高。

毓民陣營喊打抬聲勢，縱橫政壇多年嘅KK都唔係省油嘅燈，更出招假戲真做反擊對手。尋日KK就大呻，人民力量早喺幾個月前已開始落去深水埗三、四個選區，呢班人不時喺區內擺街站同派傳單抹黑民協，甚至動員搞「迷你遊行」聲討佢哋，除咗政改外，連佢冇要求喺梁展文事件中失職嘅公務員事務局局長俞宗怡下台，及支持最低工資廿八蚊都喺被批之列。

KK話，唔少街坊戥佢不值，但亦有相當多選民對佢嘅印象大打折扣，但民協卻冇資源消毒。上屆區選，佢只係險勝對方八十五票，如果毓民要搶佢票真係易如反掌……KK仲預咗七成機會失去議席云云，告急牌咁早打，都咪話唔高明。不過，KK仲話佢會「四無」應戰，即係「無悔、無懼」，又炮擊毓民嘅行動「無謂」，最後則係奮力一戰避免「無議席」。