短打長擊：死撐善用儲備 無視官富民窮

鬍鬚曾又在其網誌廢噏，為自己「善用儲備」臉上貼金。對於民間的聲音、學術界的批評，說他是「守財奴」也好，嘲諷他是「財務保守主義」也罷，又或者一個客觀嘅事實：「官富民窮」，他都一一否認。有個咁剛愎自用嘅財爺，香港明天又點會好？

鬍鬚曾成日問人有乜好提議，又說「留意見唔一定要留鬚」，如果你信佢就真係好天真好傻！一個只會閉門造車嘅守財奴，所謂「居安思危」、「審慎理財」，就係年年預算案估錯數，而且愈來愈離譜，由赤字變盈餘，相差逾千億元，「審慎」到上帝都會笑！

最令人火滾嘅係明明庫房水浸，政府眼見基層市民在通脹猛於虎下苦苦掙扎，卻翹埋雙手，視若無睹。早前有市民向鬍鬚曾遞上苦瓜請願，佢負氣地叫人拎番屋企自己煮嚟食；如今佢夠膽死大言不慚說：「當一些政府因財政赤字太大而面臨『破產』，或者因為迫不得已而大幅緊縮開支，以致民怨四起，香港反而可以利用財政儲備，推行各種各樣改善民生和發展經濟的措施。」

鬍鬚曾大言炎炎，正應了俗語所說的「山上就數老虎厲害，地下就數不要臉的厲害」，人不要臉鬼都怕！

人際關係有五個秘笈：最重要的五個字是「如果你願意」，最重要的四個字是「你認為呢」，最重要的三個字是「你真棒」，最重要的兩個字是「謝謝」，最不重要的一個字是「我」。如今鬍鬚曾反其道而行，把「我」字變成最重要的一個字，唯我獨尊，目無餘子！所以，香港沒有「官富民窮」，那民怨都是假的！