晚間收症添煩亂 資源錯配是禍根

係人都知本港公立醫院前線醫護人手奇缺，搞到醫療事故無日無之。近排流感高峰期殺到，病人激增，各大醫院急症室逼爆，醫護人員更加係得閒死唔得閒病。

好似屯門醫院咁吖，近年醫護大逃亡，舊年至今已有十個醫生劈炮，流失率達到七個巴仙，剩低嘅人手做到趴喺度。照理應該快啲增聘人手，填補空缺至係，但院方冇咁做，而係搞搞新意思。

院方將原有八間內科病房縮減到七間，騰出一間病房，改做晚間收症病房，由下午五點收到朝早九點，病人喺度過一夜先轉入內科病房。

院方吹水話呢項措施已初見成效，實施一個月後，內科病人整體住院日數大幅縮短。不過，計太一叮話齋，有冇成效並唔在於病人住院日數長短，而係醫護人手不足嘅問題有冇解決。

表面上，縮減咗內科病房，夜間當值醫生減少咗，但係晚間收症病房醫護人員嘅工作量就加大好多。呢間病房只有五個當值護士，每日要收五十至七十個病人，點頂呀？其他病房嘅護士亦一樣，除咗處理正常新症，又要處理晚間病房轉嚟嘅病人，無端端多咗好多嘢做。

唔怪之得有前線人員投訴院方「做騷，攞威」。話時話，院方實在係阿茂整餅，冇嗰樣整嗰樣。正如立法會衞生服務界議員李國麟話齋，人手唔夠仲開晚間收症病房做乜？第二朝又忙於做轉病房工作，仲浪費時間！佢直斥院方玩數字遊戲。冇錯，屯門醫院確係攞五個蓋冚六個煲，最終又咪係搵前線醫護嚟搞。叮！

咁搞法唔單止整蠱醫護人員，仲會連累埋病人，有啲年老病人行動本來就唔方便，原先辦一次住院手續就得嘞，依家要轉多一次病房，咁折騰法冇病都變有病啦。仲有，病房人手唔夠，仲要將啲病人轉嚟轉去，容乜易忙中出錯呀，如果將病人資料撈亂咗，咁咪大鑊。唔好以為太一叮靠嚇，屯門醫院不嬲事故多到冇朋友，幫病人輸血都可以撈亂血包，調亂病歷又有乜奇。

所以話，屯門醫院唔好再整色整水喇，人手唔夠就向醫管局申撥資源補番夠啦，咁樣落去終有一日會整鑊杰撻撻嘅，睇你哋點孭。

更弊嘅係，屯門醫院嘅問題只係冰山一角咋，類似情形各公立醫院都有。講到尾，都係要搵食物及衞生局局長周一嶽出嚟叮一叮，醫管局喺佢管治下資源錯配，頭重腳輕，前線人員做到嗌救命，佢一於關人個關。不如咁啦，請佢去屯門醫院晚間收症室當值幾晚，睇佢點捱。叮佢個鎯鎯！