「美容教主」鄭明明喺大年初一同老公去到新加坡，咁啱喺酒店撞到「零食天王」戴德豐太太戴胡美蓉。他鄉遇故知，分外投契，明明姐仲拉埋戴太品嘗著名星洲賀年美食─「魚生撈起」。
到底係乜東東？材料包括魚生（多為三文魚）、水果絲、紅蘿蔔絲、薑絲同花生碎等；醬料就以酸梅汁為主。品嘗前，大家要用筷子將盤內材料高高夾起，一邊用廣東話講：「撈起！撈起！」藉住諧音想攞番個好意頭，事關「魚生撈起」寓意「風生水起」、「愈撈愈旺」。
明明姐（左四）、戴胡美蓉（左一）同友人，齊用筷子夾起碟上嘅「撈起」，寓意風生水起。 （鄭明明提供）
