政情：搞搞政：KK反擊踩大輝唔識寶

政改本地立法嘅草案已完成逐條審議階段，各黨派亦陸陸續續提出各項修訂，務求令黨友包攬最多議席，其中工聯會就建議政府將五個超級區議會議席嘅門檻降低，畀前任民選區議員都有得落場跑，擺明車馬係為佢哋「票后」陳婉嫻鋪路參選。

推崇嫻姐乃公認政治領袖

廠商會嘅立法會議員林大輝尋日就批評工聯會呢項修訂冇理據，只為自己度身訂造，佢一定唔會贊成。講到興起，佢仲話工聯會唔應該成日喺博物館搵舊嘢，事關香港需要新血，應該畀多啲機會後生仔至係，佢言下嘅「博物館文物」，好難唔令人聯想起近月高調復出，仲爆響口話積極考慮參選嘅嫻姐。

畀大輝踩到上心口，工聯會議員KK黃國健條氣當然唔順。佢反駁指博物館入面嘅所有都係寶物，仲話香港所有政治人才都係經長期磨練、經歷風雨鍛煉出嚟，仲大讚嫻姐係本港公認有分量嘅政治領袖，絕對唔係博物館入面嘅舊嘢，即係踩番大輝唔識寶。