政情：大孖沙同中學生講國情

「80後」問題係特區管治嘅計時炸彈，最近一班港區全國人大、政協自發以義工形式，破天荒落區去中學講解國情發展，曲線幫手拆彈，最矚目係，當中包括多名身家豐厚嘅「大孖沙」，好似躋身福布斯香港富豪榜第五位嘅利豐集團主席馮國經、合和集團主席胡應湘同前教統局局長李國章咁，由佢哋教學生，呢幾堂國情課成本認真貴。

由全國政協常委陳永棋做會長嘅友好協進會，係港區人大同政協嘅活動平台，今次辦中學國情講座，獲全國人大常委范徐麗泰等十五名人大，同埋馮國經同胡應湘等三十五名政協「認頭」答允擔任講者，曾任教統局局長嘅李國章做召集人。講座由三月底起，涵蓋六大範疇，包括「十二五」規劃同國家體制等，已發信邀請五百間中學報名。有咁多星級講者，相信具一定叫座力。

棋哥話現時「三三四」新學制下，中學有通識教育，但少講國情，講座正好彌補不足，否認發動洗腦式國民教育。