政情：沈祖堯情人節餐夜啲食
中大尋日搞春茗，咁啱撞正情人節，以為校長沈祖堯放咗工會趕返屋企同老婆慶祝啦，點知佢爆料話原本打算同太太食晚餐，但臨時要出席一個好重要嘅飯局，惟有食完個飯局，再趕返屋企同太太食一個「夜」啲嘅情人節晚餐，到時仲會喺門前花園摘一朵花送畀太太做情人節禮物添！究竟係乜嘢飯局搞到佢喺情人節都要放太太飛機呢？佢神神秘秘唔肯講。
沈校長趁情人節祝有情人終成眷屬，兔年生多啲「兔仔」，仲以印有自己個嘜頭嘅祝賀紙仔，加多盒心形朱古力，送畀大家做情人節禮物。佢又親手寫揮春，兼送咗一套印有中大校園嘅茶壺同茶杯畀大家。
沈祖堯送贈嘅賀年手信好豐富。
