政情：Pauline唔閂再續約後門
早前立法會發出通知公告天下，話秘書長Pauline吳文華今年九月尾約滿後，將續約一年。
Pauline尋日為傳媒簡介增加議員津貼嘅建議，席間被問到續約問題。佢笑笑口自爆今年已經六十歲喇，好高興立法會畀機會佢繼續服務，嚟緊一年會忙於立法會搬竇嘅事，務求做好自己嘅工作。
明年年頭秘書處會透過公開招聘同內部晉升搵新秘書長，Pauline希望搵到有能力又有興趣嘅人接棒，仲話今時今日嘅秘書長唔單止係「程序專家」，睇嘢仲要睇闊啲，好似CEO咁，事關立法會有唔少服務提供畀市民。講到咁，莫非佢打算明年唔再續約？佢即刻好鬼馬咁話：「咁我又冇咁講。」始終唔肯閂後門。
