政情：三太四太缺席東華保良團拜
保良局同東華三院尋日齊搞情人節團拜，但保良總理、賭王四太梁安琪同東華副主席、三太陳婉珍兩大焦點人物，最後卻雙雙缺席。不過，四太人唔到，但利是照派。
保良主席Quincy呂鈞堯同班領導層喺總壇互相恭賀。娶咗韓國美人嘅Quincy今年首次派利是，心情靚爆，更靜雞雞透露希望早生貴子。今晚情人節，佢已book定蘭桂坊餐廳同太太食燭光晚餐。
莎莎老闆娘兼保良總理嘅郭羅桂珍啱啱由拉斯維加斯度歲返港，佢自爆同老公喺賭場發咗少少新年財，數目就唔講嘞。
佳節當前，東華主席Billy梁定宇約咗太太喺屋企撐枱腳，唔使同人逼，至於送乜禮物就要保持神秘嘞！
保良董事局成員齊賀新春，薛嘉麟（左起）、郭羅桂珍、呂鈞堯、龐盧淑燕、林潞、陳正欣歡聚一堂。
東華主席梁定宇（左五）同一眾董事局成員齊切燒豬，當然唔少得李鋈麟總理（左一）、施榮恆副主席（左四）同陳文綺慧副主席（左六）啦。