政情：張建宗屢甩底葉劉唔賣帳

跨區交通津貼計劃所謂嘅「優化版」出台，被各界狂轟，面臨觸礁厄運，政府惟有垂死掙扎，向立法會議員發動強勁拉票攻勢。不過對於新民黨主席葉劉淑儀嗰一票，勞工及福利局局長張建宗睇嚟可以慳番啖氣嘞！

尋日情人節，新民黨正、副主席葉劉、田北辰同史泰祖搞新春聚會，三人着住黨徽主色調嘅紅藍色「情侶裝」示人，兼宣布「喜訊」，透露黨員突破三百人大關，以及新界西辦事處快將開幕。

新正頭，葉劉同官員開年，炮轟張建宗主推嘅交津新方案刻薄，入息審查當申請人係賊，仲踢爆張建宗曾喺一個酒會上向佢拉票，結果食檸檬收場。葉劉透露一段與張建宗嘅「過節」，指四年前喺美國學成返港從政以嚟，一直邀請張建宗出席講座，聽吓家庭主婦對檢討菲傭政策嘅意見，例如「點解請外傭冇試用期？」張建宗次次應承，但次次例必冇影，所以葉劉對張建宗嘅拉票，揚言要「諗過先」，仲好直咁話：「你冇幫我，我亦冇必要幫你，好公平吖！」

五散人專業會議受厚待

啊！原來有過節，再加上當局呢個所謂「優化版」方案刻薄基層，都可謂新仇舊恨，想葉劉支持？睇怕幾難囉！

其實張建宗又真係好唔識做，以呢次交津新方案為例，佢事前專誠約晤五散人同專業會議解畫，但對葉劉，就只係喺酒會撞到講兩句，咁冇誠意就想攞人張票，唔通老奉畀票你咩！所以，葉劉尋日提起張建宗托手㬹唔肯赴會外傭講座，都呻咗一句：「局長可能唔志在我呢一票啦！」暗寸佢大細超。

所以話，睇人唔好睇表面，張建宗平日畀人印象係好好先生，同各個政黨都有偈傾，但其實私下得罪咗人都唔知，葉劉可能只係冰山一角，如果佢仲想保住交津新方案，咁就要快啲列張「交惡」議員名單出嚟，逐個敲門同人沙冧喇！