機電署渾渾噩噩 升降機牙牙煙煙

兔年講兔，「兔角龜毛」聽過未？意思係指一啲諗都諗唔到嘅嘢。各位見過兔仔長角，烏龜生毛未？但香港地幾怪都有，升降機只會上下升降係人都知，如果打橫行，咁就真係兔角龜毛咯。

馬鞍山錦英苑錦順閣前日發生恐怖升降機事件。兩名男女住客搭上到十三樓，突然聽到一聲巨響，成部撞埋升降機大堂道門，嚇到魂魄都唔齊，要撳警鐘求救。消防到場發現，大堂外門被撞到移位同變形，身半吊喺槽入面搖搖欲墜，兩人其後獲救，好彩冇人受傷。

升降機十三樓撞爆門，正一「飛來橫禍」，都咪話唔邪。有住客話，日日要搭，唔擔心就假，希望承建商加強檢查，唔使成日提心吊膽。機電署尋日循例派員到場檢查，初步調查相信，意外係升降機內門一對由窩釘碼固定嘅鋁角，喺升降機向上升時突然鬆開，同外門碰撞引起。署方又責成承辦商檢查錦英苑所有升降機，確認全部冇類似情況。

叮！鋁角鬆脫後果可大可小，機電署唔可以求其交行貨，一定要搞清楚點解例行檢查發現唔到問題。唔夠一年前，隔籬錦達閣已經發生過升降機驅動機件損壞故障。仲有呀，涉事承辦商以往亦牽涉多宗升降機事故，舊年一月曾因為冇定期檢查，畀機電署發警告信。同一個承辦商，事故一而再、再而三，今次出事冇傷亡，唔等於次次咁好彩，唔通機電署要等到搞出人命至做嘢？叮！

立法會議員王國興講得啱，今次事故相當嚴重，機電署絕對有責任加強對承建商嘅監管力度。話時話，講到監管，機電署正一生蟲拐杖，完全靠唔住。自從○八年底大埔富善邨發生升降機斷纜，由十四樓飛墮地下事件，本港兩年幾以來多次發生涉及升降機嘅嚴重事故。市民對升降機安全失晒信心，要求加強監管，但機電署一於少理。

呢，曾發生墮意外嘅大埔富善邨其中一幢上月底完成更換升降機工程，但正式開放第二日就出事，五位街坊被困近一粒鐘。如果機電署監管到位，咁荒謬一幕又點可能發生？

同樣荒謬嘅係，目前規管升降機嘅條例係上世紀六十年代產物，最高刑罰只係罰款五千蚊及入獄半年。前年馬鞍山恒安邨發生升降機鋼纜斷裂，法庭裁定承辦商同負責年檢嘅工程師未能保障升降機喺良好狀態下運作，但分別只判罰款四千及二千蚊咁大把。

計太一叮話齋，家陣樓宇愈起愈高，升降機成倍增加，由機電署班渾渾噩噩嘅官僚揸住本「老皇曆」監管，等於揸火藥槍對付巡航導彈，一定輸硬。叮！