政情：張震遠速遞蛋糕冧老婆
日前見到市區重建局主席張震遠喺太子大廈COVA買蛋糕，佢雙眼喺蛋糕專櫃前來回掃射，最後揀中一個栗子蛋糕。原來佢甚少食蛋糕，係太太鍾意食至真。點解要佢親自去攞？佢就輕描淡寫咁話：「咁啱經過，順便啫。」
之後佢飛快以九秒九極速跑去遮打道攞車，最後好彩成功趕到冇抄牌。其實佢喺半路中途電話響起，行到座駕，佢唔想嘥時間，於是左手攞住電話，右手將盒蛋糕放喺地上，再摷車匙開門，然後將蛋糕安頓喺後座，都幾狼狽㗎！為討太太歡心，佢竟然唔介意做「蛋糕速遞員」。
為氹太太一笑，張震遠親自出動去COVA買蛋糕。 （陳嘉順攝）
