政情：袁彌明改造宅男除四民
喺社民連分裂出嚟、旨在要喺未來選舉「除四民」嘅人民力量，雖然成立冇耐，但近日已密密開會為嚟緊嘅區選做準備。
由於人民力量嘅成員唔少都係冇乜政治經驗嘅網友，而召集人甄燊港亦坦言有感香港人好現實，一向都形象行先，故佢哋決定搵自己友、前港姐Erica袁彌明負責宣傳部，兼做埋形象指導，幫班成員嚟個「宅男大改造」，除幫佢哋執執個殼外，更會訓練佢哋待人接物嘅態度，仲直言嗌咪都需要一套好高嘅技巧喎。Erica選過港姐，固然睇得又talk得，但班成員對住佢能否專心上堂，就真係唔知嘞。
甄燊港又話人民力量喺未來兩個月將會分批接收成員嘅出選意向書，預計三月後會認真作選舉部署，務求白鴿黨、民協、工聯會同建仔嘅候選人，喺每區都有人「服侍」。
袁彌明將會開班，幫人民力量嘅成員嚟個「宅男大改造」。 （資料圖片）