政情：Tanya冇情人唔守株待兔
舊年同仙宮樓老闆叢鐵飛（英雄哥）甩拖嘅公文袋立法會議員Tanya陳淑莊，今日將要度過佢九年嚟都冇經歷過嘅「單身情人節」。
Tanya尋日出席兔友協會嘅活動，鼓勵市民為寵物絕育，仲即場為十二隻已進行絕育手術嘅兔仔「證婚」，等佢哋過一個甜甜蜜蜜嘅情人節。兔仔尚且有個伴，咁今年孤家寡人嘅Tanya今日又點過呢？佢直言今日將會忙到飛起，上晝下晝都有會開，夜晚就會同一班同係單身嘅朋友開P狂歡，冇情人一樣有節目。
回復單身嘅Tanya笑言，自己絕對唔會守株待兔，但強調愛情呢啲嘢急唔嚟喎。佢早前話同英雄哥分手係因為自己議員生活太忙，事業愛情難兼顧，唔知佢呢刻想連任多啲，定係想搵番個男友多啲呢？
