政情：龕場諮詢避區選梁卓偉心有鬼

年底嘅區議會選舉備受注目，因為當選人隨時有可能出選立法會超級區議會議席嘛。今次區選事關重大，除咗各大小政黨對區議會選舉虎視眈眈外，連一向獨斷獨行、漠視區會意見嘅政府都異常「重視」，竟然連某啲政令都要行埋一邊。唔係啩？

仲記得舊年鬧得滿城風雨嘅公營骨灰龕選址風波，政府先後兩次合共推出十七個地點進行公眾諮詢，其中最受爭議嘅沙田區，當時選址公布後，即時惹嚟受影響居民強烈反彈，示威遊行樣樣嚟，加上區會對部分選址有好大意見，結果搞到獲委派處理呢個炸彈嘅食物及衞生局副局長梁卓偉灰頭土臉，相當冇癮。

事隔半年，呢個燙手山芋已慢慢冷卻落嚟，但政府就遲遲唔肯公布諮詢結果。據聞，早前有班地區人士見過梁卓偉，期間有人講起，選址結果遲遲唔公布，令到受影響同反對嘅街坊相當擔心，始終一日未有確實答案，大家都唔知點做好嘛。說罷，梁卓偉即時面有難色，哦哦，一味話仲蒐集緊地區意見同做緊研究，等有晒全盤數據之後先會再公布喎。

孭鑊隨時冇得升局長

有消息人士話，政府以往都會快刀斬亂麻，今次拖嚟拖去，除咗知道爭議好大之外，相信亦係評估到因區選臨近，依家推第二批骨灰龕選址咪等如送彈藥畀泛民主派喺區選撈政治油水，即使係政府嘅親密戰友冒險支持，但眼見泛民抽水抽得咁過癮，怕蝕底可能會鬧埋政府去搶分，咪就好似申亞滑鐵盧嘅翻版囉，睇嚟至少等區議會選舉選情明朗化之後先會公布選址。

坊間一路都盛傳梁卓偉係下任食衞局局長嘅熱門人選，消息人士話佢上任至今嘅表現總算不過不失，骨灰龕呢單嘢搞唔好隨時令佢出局，難怪佢點都唔肯確實講幾時先會公布落實嘅選址名單，避開區選先算。