單車徑無影無蹤 搞環保純屬吹水

香港一年到尾都有市民遊行請願，訴求五花八門，應有盡有，大家早就見怪不怪咯。不過咁，以單車巡遊來表達訴求就特別啲喇，呢，尋日有六百幾名單車愛好者由西環踩到筲箕灣，佢哋嘅要求其實好簡單，就係爭取興建一條連貫港島東西區嘅海濱單車徑。

正如請願人士話齋，單車係最環保嘅交通工具，又慳錢，又健康，又安全。興建海濱單車徑，打造港島環保交通要道，既可以鼓勵市民用單車代步，紓緩交通擠塞；又可以減少汽車排放污染物，改善空氣質素；甚至可以發展特色旅遊，吸引外地旅客，直頭係一舉多得喇。話時話，地區人士多年前已經提出相關建議，而爭取興建港島海濱單車徑巡遊亦已連續第四年舉行，可惜嘅係，市民有市民要求，政府有政府詐傻扮懵，咁多年來完全冇動作，叮！

潮流興環保，單車代步已成為一種國際趨勢，尤其係北歐國家，單車甚至成為主要交通工具添。港府開口環保，埋口減排，甚至吹水話要打造乜嘢綠色城市添，點知打造嚟打造去，連一條單車徑都打造唔成，簡直係笑話。

立法會議員就講得啱嘞，港府視單車徑為康樂設施嘅觀念已經太落後，其實單車應該係大城市嘅主要輔助交通工具，既環保又方便，何樂而不為。老實講吖，事在人為，要興建海濱單車徑，根本冇乜技術難度，問題係當局肯唔肯做啫。

最好笑嘅係，港府口口聲聲支持單車運動，但淨係得把口齋噏，莫講話港島海濱單車徑講嚟講去都冇下文，連嗰啲早就拍板嘅單車設施亦係一拖再拖。例如當局○四年提出喺大嶼山南部興建越野單車徑，原定○八年完工，結果拖到舊年至訂出具體方案；又例如當局早就計劃將新界單車徑連接成一個完整網絡，點知拖足十幾年，據講最快都要四年後至可以落成喎。唉，等得嚟蚊都瞓喇！

港府做嘢好似蟻躝，搞到單車徑好似斷截禾蟲咁，加上規劃失當，周圍都係陷阱，踩單車簡直要搵命博，連香港人都怕怕喇，仲點樣可以成為綠色城市，點樣可以吸引旅客呢？

講番港島海濱單車徑，發展局局長林鄭月娥○九年曾講過，規劃署已展開港島東海旁研究，包括探討西接灣仔、東達小西灣嘅海濱長廊，以及考慮喺部分長廊興建單車徑喎。講就天下無敵，但究竟仲要探討到幾時呢？計太一叮話齋，如果連興建一條單車徑咁簡單嘅事都要研究嚟研究去，仲講乜嘢發展六大產業吖，不如收皮罷啦，叮！