SUN角度：貧富懸殊 犯罪率勢升

倘若本港的樓價持續高企，加上社會低下階層缺乏向上爬機會，普羅大眾愈趨困苦下，社會更容易出現不安、憂慮情緒。研究犯罪學的專家指出，貧富懸殊下，犯罪率就會愈來愈高，政府不能繼續對貧苦大眾坐視不理，否則只會徒添動亂的危機，隨時爆發！

變相鼓吹笑貧不笑娼

香港城市大學犯罪學課程主任黃成榮表示，量度貧富懸殊的指標堅尼系數愈高，即代表貧富懸殊持續惡化的話，男盜女娼情況會愈趨普遍，「好似印度咁，社會急劇發展，而政府嘅管治又追唔上，貪污、舞弊、用人唯親都無人監督下，普羅市民就算讀到大學，畢業後因好難搵到份好工，就會笑貧不笑娼，其他人亦會有樣學樣，增加社會不穩定性。」

黃成榮續稱，香港現時仍有高薪養廉及良好法治基礎，所以犯罪率仍維持低水平，但他警告港府：「若然政府庫房有大量儲備，但基層享受唔到經濟成果，加上內地人搶貴樓價，港府無力阻止下，呢啲因素對社會穩定都造成隱憂。」黃成榮指出，當局應考慮是否需要適度壓抑樓價，制訂更好的房屋政策，否則恨錯難返。

市民心聲

陳先生 （金融）

「物價係咁加，但人工唔加，貧富又愈來愈懸殊，但政府嘅稅制同福利都對應唔到問題，民怨就梗係愈來愈多。」

錢小姐 （學生）

「出咗嚟住生活費好貴，咩都加價，我每月得二千蚊零用錢，惟有食少啲，啲低下階層分分鐘無得食，政府幫唔到我嘅。」

曾小姐 （醫療）

「啲商場食肆食個午餐要成四、五十蚊，私人樓又貴到離晒譜！令中產生活好苦，政府照顧唔到，啲人積埋好多不滿情緒。」