政情：林鄭狂派高帽冧建仔

發展局局長林鄭月娥新春好活躍，尋日又見佢出席建仔嘅灣仔支部新春酒會，反而專責同政黨打交道嘅政制及內地事務局就唔見局長林瑞麟，由副局長黃靜文出席。好打得嘅林鄭尋日表演咗一手「講得」絕招，又讚建仔嘅地區宣傳工作，又猛拉關係，高帽四圍派，搞到場內人人笑開顏，黃靜文睇怕袋咗唔少錢落袋！

建仔主席譚耀宗同副主席張國鈞都有出席酒會，林鄭話，自己係虔誠嘅教徒，雖然唔係住灣仔，但每個星期至少都會落灣仔嘅教堂做禮拜，每次行到去電車站附近，都會見到建仔嘅區議員同義工喺度派傳單。明讚勤力之外，林鄭又話，佢每次都想伸手去攞，但對方見係佢就即時收番張傳單，因為佢哋知道局長相當了解建仔嘅工作，唔想浪費張紙喎。一件小事連派勤力同環保嘅高帽，難怪灣仔區議會主席孫啟昌一聽笑到見牙唔見眼。

不過，林鄭都好巧妙，趁機為發展局喺灣仔區進行嘅工作包括重建、保育等做吓宣傳，表現到自己同灣仔關係密切，跟住佢又借用建仔「真誠為香港」口號，呼籲「真誠為香港」嘅人一齊參與年底區議會選舉，認真識撈！