政情：金勞詹轟警鬼祟抄牌陰招
立法會議員「金勞詹」詹培忠近日忽然扯火，更「忽然民生」！佢準備本月廿三日喺立法會提質詢，質疑警方喺非交通黑點嘅香港仔隧道口恢復抄牌，等如裝駕駛者彈弓，派多幾張牛肉乾交數。
點解金勞詹為咗警方喺隧道口恢復抄牌咁勞氣呢？家住淺水灣嘅金勞詹，有架金色勞斯萊斯同全港獨有喺後座裝設按摩椅嘅金色豐田七人車，唔通日日取道香港仔隧道，曾經中招？怒漢矢口否認提質詢係為咗自己，澄清從未喺香港仔隧道口被抄牌，即使有，佢都唔會因為嗰一千幾百蚊動氣。
佢話，今次純粹路見不平，睇唔過眼警方嘅所作所為。金勞詹話，香港仔隧道入面行車最高時速七十公里，但一出隧道就變五十，駕駛者好易誤墮超速陷阱。
