政情：施榮懷罐王爭廠商會寶座

中華廠商聯合會現任會長黃友嘉嘅任期將喺年底屆滿，新一屆會長嘅選舉工程已靜雞雞啟動。消息話，廠商會上月舉行會董會以壓倒性票數通過將會長任期，由兩年改為三年。有意競逐會長寶座嘅人則以副會長施榮懷同羅富昌呼聲較高。

有七十幾年歷史嘅廠商會會長任期屢變，原本係兩年、不設連任限制；到福建幫頭領、全國政協常委楊孫西上任後，即推動修改會章，將任期改為兩年，不得連任。自此歷任洪克協、尹德勝同埋黃友嘉幾位會長，都係做兩年就換人。不過，實踐後又發現兩年任期實在太短，會長難以推展會務。

傳可能落場嘅永富容器集團主席羅富昌有「中國罐王」稱號，喺三十幾年前創立咗美特容器廠，至今依然喺呢行執牛耳。至於福建幫頭領施子清二子施榮懷，則出任多項公職，除咗代表商會加入勞顧會，亦揸大旗搞過工展會等。廠商會下星期四（十七日）舉行新春團拜，兩位熱門人選嘅一舉一動勢備受關注。