政情：李偉儀摧花淚斷玫瑰退黨

內訌大半年嘅社民連尋日上演斷情終極篇！以創黨主席黃毓民為首嘅「倒陶派」趁尋日社民連舉行會員大會，由曾擔任社民連副主席嘅李偉儀聯同盟友踩場，聲稱三百人一齊退黨，仲將三百幾份退黨信擲向主席陶君行以示不滿。不過，「倒陶派」都攞唔到甜頭，事關社民連成員亦連環出招，打感情牌高呼「相煎何太急」；最後，領隊踩場嘅李偉儀再來一幕淚流披面，仲喺情人節前兩日送剪斷嘅玫瑰畀阿陶以示斷情絕義，過程真係好睇過做戲。

尋日嘅大會喺下晝兩點半開始，李偉儀化行妝到場，雙眼通紅嘅佢話要過嚟盡會員嘅最後責任，向現任領導層表示不滿，退黨後彼此就「兄弟爬山，各自努力」。小休期間，大會主持兼灣仔區議員麥國風忽然揸咪游說退黨派放棄，更以「本是同根生，相煎何太急」作呼籲，期間，麥語帶哽咽，卻畀退黨派喝倒采，有人直斥「扮乜嘢」？

社民連收逾三百退黨申請

三個鐘之後，李偉儀同一眾倒陶盟友見記者，宣布收到三百一十七份退黨申請，又指社民連已經冇咗成立之初嘅理念，一度激動得淚流披面，又將一束玫瑰剪斷送畀阿陶，點知畀人窒番轉頭話：「好彩今日唔係情人節。」

社民連最後話，總共收到三百零七份退黨申請，但其中六十份冇簽名作廢、十八份係重複、三十五份就唔係會員，剩低一百九十六份申請會處理。阿陶強調「聚散有時」，李偉儀就指暫時唔會喺年底嘅區議會選舉追擊舊黨友，但以後就好難講，咁即係話好難西線無戰事嘞！