政情：搞搞政：潘佩璆燒鬚湊唔掂孫仔

唔經唔覺，工聯會立法會議員潘佩璆做咗爺爺已經四個幾月，佢尋日透露，孫仔身體相當健康，肥肥白白，跟住自爆原來孫仔嘅體重之前曾一度跌到幾乎要入院嘅水平。吓！唔係啩？

潘佩璆本身係聯合醫院精神科顧問醫生，阿仔同新抱都係醫生，一屋三個醫生應該對BB嘅照顧係無微不至先啱㗎，點知竟然湊唔掂，搞到BB瘦成咁？佢哋都可謂老貓燒鬚囉！

係咪同近日坊間出現搶購奶粉潮有關呀？潘佩璆話唔係，完全冇受影響，事關孫仔係食母乳兼飲日本奶粉，所以糧食絕對充足。佢仲話好彩經一番努力之後，孫仔依家嘅體重已經回復到正常水平，仲重過大部分同齡嘅BB添！

一直盛傳潘佩璆出年會代表工聯會參選立法會港島區直選，佢話近排加碼落區見街坊，最近仲打算喺香港仔華富邨開多個辦事處，實行擴大工聯會版圖。佢強調工聯會同其他建制派政黨嘅票源不盡相同，最緊要都係要做好自己先。