政情：田二少掃街日做九粒鐘

擁有全球七百間分店時裝王國嘅田家二少爺、新民黨副主席田北辰，早前參加咗體驗貧窮嘅真人騷，過咗幾日接近赤貧嘅生活，時薪仲只係得二十五蚊！

本港一個電台搞咗一個節目，第二輯共有六位城中名流參與體驗貧窮，田二少係其中之一。佢被安排做掃街清潔工人，日日做足九粒鐘。影片所見佢戴住口罩落手落腳執拾街邊垃圾桶，見到垃圾桶入面嘅污糟嘢，佢都忍唔住話：「好恐怖！」攰極就坐喺街邊閉目養神，成個人落晒形，同佢平時身光頸靚差天共地。

負責拍攝嘅幕後人員爆料話，佢哋用咗兩年時間游說田二少參與，今次終於打動咗佢。事前田二少好關注衞生問題，驚自己會病，好彩最終順利完成拍攝。

被形容為富三代嘅潮州商會青年委員會主任陳光明，係彩星玩具創辦人陳大河嘅孫仔，佢喺社聯副主席陳智思嘅游說下，亦體驗咗幾日執紙皮、住籠屋嘅窮日子，佢笑稱陳智思係佢嘅「仇人」。已故社交名人周啟邦囝囝周國豐亦暫別多采多姿嘅生活，體驗速遞員同珍珠奶茶店員嘅生活，話要證明自己唔係二世祖。