政情：黃埔東區選三女混戰

年底嘅區議會選舉，其中一個焦點將會喺九龍城區議會黃埔東選區。事關喺○七年區選中，以四百幾票踢走盤據黃埔東八年嘅白鴿黨陳家偉嘅專業會議立法會議員梁美芬，今年除要面對誓報一箭之仇嘅白鴿黨黃碧雲外，仲可能多咗個半路殺出嘅勁敵，就係挾住前港姐之名嘅選民力量成員袁彌明，形成三女混戰局面。

鼠王芬尋日一早展開車輪式落區拜年活動，對於三女混戰，佢看似處之泰然，坦言歡迎大家一齊做好社區，仲話應戰方法就係做好本分，相信呢幾年嘅地區服務都為人接受，而今日佢仲會拉埋老公同兩個仔，一齊同黃埔東居民拜年。

喺舊年政改一役擔任普選聯副召集人嘅黃碧雲，佢嘅盤算係即使袁彌明喺黃埔東落腳，頂多攞到泛民選民中最激嗰一成人選票，即係走百幾二百票，但咁樣已足以令佢落敗，所以佢嘅策略係做好自己同埋提升選民危機意識，谷高投票率，因為投票率高，對白鴿黨最有利。

不過，袁彌明話落腳邊區仲有待商討，但佢喺黃埔碼頭已掛咗橫額，相信區會經歷四年洗牌，好多嘢都唔同咗喎！