政情：劉麥懿明拍老公從商
喺○九年十二月同政府講拜拜嘅稅務局前局長劉麥懿明，一年禁制期過咗冇耐，舊年平安夜悄悄下海從商，加入凌速有限公司做獨立執董。間公司名熟口熟面，其實係劉太老公劉偉傑旗下間公司。劉偉傑係何許人也？咪就係年年負責籌辦動漫節嘅凌速博覽有限公司主席囉！
記得喺○九年嘅動漫節開幕禮上，民政事務局前常秘「媽打」李麗娟都畀面撐場，當時大家都覺得好奇怪，後來媽打爆料話係劉偉傑搵佢嘅，仲爆埋劉偉傑同劉太嘅夫妻關係，當時仲做緊稅務局局長嘅劉太亦有現身撐老公添！
呢次劉太加入凌速有限公司做獨立執行董事，負責出席董事局會議、監察公司高層同制訂公司政策等，可謂開正劉太嗰瓣。