政情：劉吳惠蘭潛水專家

被嘲為「翻版惡導遊阿珍」嘅「刀手蓉」林如蓉同內地遊客講手事件曝光後，引起全國嘩然，就連中央電視台都以「旅遊醜聞」為標題高調報道，令本港旅遊業再次淪為全國笑柄。

連日嚟，無論係旅遊業議會或旅遊事務專員容偉雄，都趕緊出嚟撲火，偏偏身為專責旅遊事務最高階官員嘅商務及經濟發展局局長Rita劉吳惠蘭就潛水唔見影，直至尋日年初五、亦即係新年長假期後嘅首個工作天，至蒲頭回應事件。

問責制假期癱瘓

仲記得舊年爆出惡導遊阿珍事件時，Rita同樣潛咗水，負責出嚟拆彈嘅，竟然係有如做埋政府官員嗰份嘅旅遊發展局主席田北俊，就連立法會旅遊界議員謝偉俊嘅反應都快過Rita。最後，Rita喺事情漸漸降溫後先施施然登場，話要成立專責小組規管導遊云云，隨後又率團同國家旅遊局會面補鑊。

旅議會喺「阿珍事件」後，隨即推出十招救亡，偏偏措施出台後不足一個禮拜，又爆多單「翻版阿珍」出嚟。查實本應搞到政府好閉翳至係，但Rita今勻照舊潛水，遲遲冇出嚟救火，就連副局長蘇錦樑都唔見影，初嚟甫到負責旅遊嘅常秘黃灝玄更加冇聲出。

究竟問責制係點運作㗎？根本就係癱瘓咗，令人覺得班問責官員「放假大過天」，未開工乜都唔做，第日喺假期又爆大鑊嘢，係咪要深海尋人，刮番局長出嚟呢？

等到刀手蓉醜聞單嘢尋日收科嘞，Rita至蒲頭，仲義正詞嚴咁話，只要有一宗個案發生，佢都不能夠接受。既然Rita對今次事件咁「遺憾」，理應早啲出嚟回應至係吖，而唔係等件事攤到凍晒，先至出嚟抽水兼補鑊，擺明佢又好似惡導遊阿珍事件咁，喺風高浪急嘅時候就潛水，揀啱時機就向外界表示自己「有做嘢」。