地區基建齋吹水 綜合設施了無期

風水佬至多呃你十年八年，政府仲巴閉過乜乜居士、物物大師，一項社區設施工程可以祭出拖字訣一再推延，呃你十年有多都繼續呃落去，問你服未！

前排港府申辦亞運因為民意幾乎一面倒反對，起錨變拋錨衰咗。曾蔭權事前拍晒心口，話就算申亞失敗都會投放至少幾百億元興建同改善多項體育設施，講到好似真嘅一樣。之不過，政府講嘢信半成都嫌多，尤其係文娛康樂設施，「爛尾工程」多不勝數。呢，話口未完又嚟一單。

沙田區內康體設施只有五個室內體育館同三個公共圖書館，遠遠滿足唔到超過六十萬居民嘅需要。社區設施不足通常只有一個原因，就係地皮矜貴冇碇起，但沙田完全唔同，規劃早就有，工程一拖再拖了無期。

查實早喺二○○○年，當時嘅區域市政局已經計劃喺愉翠苑旁邊一幅近六千平方米嘅空地，興建包括體育館、分區圖書館同社區會堂嘅綜合設施，預計○二至○三年間動工，○三至○四年間完工。

弊在政府做嘢有計劃唔等於有行動。二○○○年政府「殺局」後計劃即時暫停，後來更由「暫停」變為「無期」。家陣呢幅地以短租形式租畀人做臨時停車場，綜合設施連個影都冇。

有區議員踢爆，沙田區議會早已經通過將工程列為優先處理項目。佢過去幾年一直追問當局工程幾時開始，但康文署始終拒絕確認開工日期。沙田居民等咗超過十年依然得個等字，實在太離譜。叮！

沙田區康體設施早已經不敷應用，康文署接手原區域市政局工作，工程冇加快不特止，仲變咗遙遙無期。立法會議員陳克勤就批評得啱嘞，香港財政充裕，如果「兩局」年代工程唔盡快開始，會令市民好失望。

同樣令人失望嘅，仲有康文署嘅太極功夫。署方回應查詢嗰陣，唔止冇交代施工時間，仲講咗一大輪廢話，話康文署一直「積極跟進計劃」，會盡可能加快工作，盡早落實計劃喎。叮佢個鎯鎯！工程拖足十年仲係得空地一幅，積極跟進變咗消極拖延，試問班懶官仲打算點「加快」吖？

其實康文署接手市政局及區域市政局工作後，對兩局留低嘅康樂文化設施工程一直闊佬懶理，拖得就拖。據港府向立法會提交的文件顯示，直到○九年八月底，一百三十九項工程至少仲有五十五項尚待進一步覆檢，就算係部分已經完成嘅工程，亦最少比兩局預定嘅完工日期遲一到兩年。

單係小小一項社區綜合設施，拖咗十年未見影，政府仲要繼續玩隱形。計太一叮話齋，政府成日吹水促進社區和諧同改善社區設施，查實通通都係呃鬼食豆腐。叮！