政情：李慧琼或戰超級區會
競逐下屆立法會超級區議會議席嘅人選，牽動直選擺位，據聞建仔內部至今仍以「新人派」聲音較響，話晒叫大佬輩插區選區議會，始終阻塞新人上位之路，爭議較大。
建仔高層之內有消息指出，喺第二梯隊中，現以立法會九龍西直選議員李慧琼、葛珮帆同鍾樹根嘅呼聲較大，三人之中，又以李慧琼看高一線。理由主要有兩個，第一，以曾經喺立法會直選中排頭位、全港知名度較高嘅人披甲，喺講求人氣同聲勢嘅超級區議會議席選戰始終有着數，得勝安全系數高啲，太新嘅人怕壓唔到陣。第二，九龍西內有新星鄭泳舜等上位，但建仔喺九西嘅形勢係一席必穩，兩席太難，若然李慧琼轉戰超級區議會，就可騰出空位畀鄭接棒。
但據聞李慧琼唔太願選超級議席，怕自己資歷尚淺，應付唔嚟，而且只係做咗一屆直選議員就過橋抽板，唔係咁好喎！
