政情：搞搞政：黑英買$10豬肉捱鬧

天文台前台長「黑英」林超英尋日喺大氣電波話，退休後發覺自己以前只識返工，日常生活嘅瑣事反而搞唔掂，連去街市買十蚊豬肉都被拒，搞到畀豬肉佬歧視：「得十蚊咁少，點切呀？」點解畀豬肉佬鬧？黑英講笑話，中年男士去街市買餸唔夠女士着數喎！

錯晒！依家通脹加劇，豬價升咗好多，黑英真係買豬肉唔知價。豬肉佬理得你係乜水？前高官又點，都照鬧，差在未鬧佢係豬頭炳咋！

結果黑英要對住豬肉佬解釋原委，話「男人老狗得一個人食飯，好慘o架……」最後對方至肯切十蚊豬肉畀佢。後來黑英買多幾次十蚊嘅豬肉，仲做咗豬肉佬嘅熟客仔。

黑英仲話退休初期高估咗自己能力，依舊不停出席大小活動，似患咗退休後過度活躍症咁，至幾個月前終於覺得攰，發現唔應該太忙，於是今年開始工作推得就推，就算去旅行都唔鍾意奔波勞碌，反而鍾意喺香港行吓走吓，例如得閒去西九龍海濱長廊散散步，咁成個人都舒暢啲。