政情：貴酒慰高達 單雞肉赤
有幾多政黨會考慮派人競逐下屆特首選舉？白鴿黨副主席「單雞」單仲偕尋日話傾向派人落場參選，認為咁做最少都可以畀多啲壓力下屆特首候選人，又相信下年唔會好似○五年黨友「高達」李永達咁，連提名人都攞唔夠。
佢仲自爆當年高達挑機失敗後，請咗高達上佢屋企食飯，開咗支喺英國買返嚟嘅九六年Lafite安慰佢，當年折實港紙三千幾蚊，點知同高達分享咗支酒後，至發現同一年份嘅Lafite已經升價至五位數字，都不知幾肉赤，當堂後悔自己太豪氣。
至於年底嘅區議會選舉，單雞話會派百三人參選，希望攞到六十五席，如果達標就證明白鴿黨有能力派兩張名單競逐選超級區會議席，所以結果好具指向性。為應付其他人追擊，白鴿黨仲會開班訓練候選人點應對謾罵，希望將追擊嘅影響減到最低。
