外界多次問立法會議員陳克勤幾時同蜜運多年嘅金融界女友結婚，但佢都只帶大家遊花園。踏入兔年，克勤仔終於一改以往口風。
克勤仔尋日偕同建仔大埔區多名區議員登上新春花車，向新界東街坊拜年兼派利是。巡遊期間，記者又問佢幾時同女友拉埋天窗，佢竟然豪氣咁拋下一句：「希望啦！」仲透露佢有意結束愛情長跑，但坦言女友家人向來唔喜歡鋪張，所以即使結婚都會低調行事喎。查實克勤仔三十出頭，絕對係適婚年齡，加上明年就係立法會換屆，話唔定結婚有助谷人氣，一舉兩得！
蜜運多年嘅克勤仔（右二）終考慮今年結婚。
