政情：預算案扮勤力鬍鬚曾面皮厚

作為政府大掌櫃嘅財爺，最重要係撰寫財政預算案，事關佢一個決定足以影響市民嘅生活，可惜我哋嗰位只懂講劍擊同功夫嘅財爺鬍鬚曾就懶得理你，連寫預算案都懶懶閒，搞到要臨急抱佛腳。

鬍鬚曾尋日喺網誌度竟然大呻自從喺○七年起做呢份工後，逢親春節都要為寫財政預算案做「最後衝刺」，新年對佢嚟講只係「加班（OT）絞盡腦汁嘅時間」，而非「偷閒嘅時間」。佢咁講，擺明係想乘機話畀外界知佢有幾「勤力」，點知又重蹈覆轍，再次露底。

淨識整牛腩煲懶派糖

查實預算案每年都係喺二月中旬或下旬發表，呢個安排唔係突然爆出嚟，而係年復一年冇變過，鬍鬚曾應該心知肚明，理應早啲開始諮詢工程，令整個撰寫工作流暢啲，而唔係好似依家咁，堆埋喺農曆年假期先OT去做。佢家陣咁講只會令人覺得佢無能，而唔係勤力，好彩政府唔使畀OT費畀佢啫，否則畀佢亂篤鐘，唔止浪費公帑喺佢身上，連佢誠信都有問題呀！

佢仲喺網誌話，喺過年前帶咗親自炮製嘅牛腩煲去一個四代同堂嘅家庭團年，為咗令「有牙冇牙」嘅都可以品嘗，於是喺牛腩煲加入蘿蔔。佢真係臉皮幾厚，過去幾年嘅財政預算案都舊調重彈，了無新意，漠視夾心階層需要，令一班無納稅、無樓同無攞綜援嘅「三無人士」都冇得受惠，難為佢仲講得出呢啲說話。

政府早前公布首九個月財政狀況，最後埋單計數可能有近千億元盈餘，而新一份預算案仲有兩個幾禮拜就發表，依家庫房水浸，好多政團都趁新春上街請願，希望政府聽取民意，開倉派米，即係等緊接財神，可以解困，若果鬍鬚曾繼續做守財奴嘅話，咁市民肯定一腳伸呢個衰神出街，仲有就係掃把掃佢番去煮牛腩煲，唔使佢做財爺喇！