工程顧問亂收費 妹仔大過主人婆

港府施政有個特色，就係事無大小都要委託顧問公司研究一番，甚至連地區小型工程咁簡單嘅事亦唔例外。結果呢，妹仔大過主人婆，顧問費隨時仲貴過工程費，你話係咪混帳吖！

話說港府向區議會下放權力，○八年起畀全港十八區區議會審批地區小型工程，點知實施兩年幾問題多多，尤其係顧問費貴到離譜，講都冇人信。例如大埔港鐵站對開的士站最近起咗個避雨亭，業界估計工程只需七、八十萬元，但顧問公司開天索價，最後埋單竟然要三百幾萬，而且工程仲做到甩甩漏漏，去水位設計唔啱，上蓋又覆蓋唔到行人路，根本物非所值。

民政事務總署仲死撐，聲稱喺每年三億元地區工程總開支裏面，平均每年顧問費九百萬元，屬市場合理價錢喎。但有區議員就踢爆，由於港府闊佬懶理，加上制度欠透明度，搞到地區工程貴到飛起，所謂顧問費同工程開支根本係一筆糊塗帳。

最離譜嘅係，顧問公司經常打死狗講價，用各種原因提高造價，搞到好多工程大幅超支，而且無論工程做唔做得成都好，佢哋都照收顧問費。呢，深水埗區議會舊年提出喺全區馬路欄杆加設花盆，完成所有揀花同花盆工作後，至發現標書造價高達五至六百萬元，比預期貴咗成倍，卒之拖到依家仲未成事。其實，近年好多顧問報告提出嘅建議都唔獲港府接納，結果報告白做，費用白付。

叮，港府淨係識得撥款，唔識監管，又點可能唔搞到亂晒龍吖。好似耗資逾一千四百萬元嘅新田足球場咁，居然起喺無車到嘅山旮旯，場內人影都冇隻，但十幾盞大光燈就晚晚照開。仲有吖，銅鑼灣社區中心外牆有個大型屏幕，居然對住行車天橋，地面嘅人睇唔到，坐車嘅人又睇唔切，都唔知究竟係邊間顧問公司嘅傑作。

唉，港府放權畀區議會，增加區議會嘅地位及功能，本來係好事，點知港府放權之餘，居然連監管責任亦放棄埋，簡直荒謬絕倫。正如區議員話齋，以前用七百萬元就可以翻新七個社區會堂，如果家陣乜都要搵顧問公司研究一番，成本必定大增，睇怕增加一倍價錢都未必夠找數。

話時話，大部分地區小型工程其實都好簡單，完全冇技術難度，根本唔需要嘥錢搵顧問公司研究。港府阿茂整餅，冇嗰樣整嗰樣，講到底都係為咗卸膊，呢啲咪叫做善財難捨，冤枉甘心囉。不過，咪話太一叮唔提醒，卸膊還卸膊，如果當局繼續攞納稅人嘅血汗錢嚟較飛，遲早叮爆佢哋嘅鎯鎯！