政情：鄧鉅明京滬穗連開五店
進軍內地已成大趨勢，太子珠寶鐘錶主席鄧鉅明（Jimmy）尋日透露，旗下公司手頭資金充裕，係適當時候開發內地市場，打算斥資過億港元喺內地開設三至五間鐘錶店，分店將遍及廣州、上海及北京。
依家先起步會唔會太遲？Jimmy話，佢哋有充裕資金先可以承擔風險，加上內地發展潛力巨大，有心唔怕遲。
Jimmy仲透露，旗下公司將代理一部瑞士製造嘅LeDIX名貴摺疊式手提電話，內設陀飛輪裝置，並使用透明機殼，可睇到內部機械操作，最大特色係毋須電池，只要每打開一次電話就可自動儲存三小時電量，最多儲存一百二十小時電量。
不過，咁先進嘅手機自然價值連城，每部售價高達二百五十萬港元，呢個價錢可以買到一個普通住宅單位，而全港亦只得二十部，簡直係尊貴象徵。