政情：搞搞政：林鄭赤口落區被噴苦水

高官過年前開始接力落區做騷，踏入兔年，發展局局長林鄭月娥更一連兩日喺初二同初三落區探訪長者同村民，不過笑騎騎嘅林鄭都遇到村民吐苦水，希望政府搞重建時，照顧吓啲新界古老村落嘅重建問題，雖然居民官員冇嗌交，但林鄭都不無尷尬，可見赤口日做騷嘅風險真係好大。

促重建唔好淨係掛住市區

林鄭前日喺社會福利署副署長林嘉泰陪同下，去咗黃大仙慈正邨探訪獨居長者；尋日就應老友西貢區議會主席吳仕福邀請，去到西貢三條村探訪，了解村民生活。佢走訪咗官門漁村、靈恩台同伯多祿村，有一位婆婆向佢大吐苦水，話老人家有病唔知點求助，又話即使政府有福利，佢哋都唔知去邊度拎；亦有居民要求政府搞重建時，唔好淨係掛住市區。

居民訴咗苦，林鄭有幾多聽入耳真係唔知，但佢此行都趁機講吓以前做過社署署長、甚至八三至八五年做過西貢民政事務助理專員，畀人多面手嘅感覺。最好笑係，居民祝佢步步高陞，一直盛傳係下任政務司司長熱門之一嘅林鄭卻面露尷尬之色：「唔好喇啩？不過都多謝晒！」