政情：葛珮帆澳洲遊遇風落難
澳洲昆士蘭被百年難得一遇嘅超強颱風亞西吹襲，早前去咗當地旅行嘅建仔常委葛珮帆（EQ）都被迫滯留。佢尋日講到澳洲驚險之旅時，透露颱風吹襲當日，佢同老公都要執包袱，同超過四百個旅客一齊到酒店嘅宴會廳避難。
宴會廳同其他旅客大覺瞓
同老公去澳洲自駕遊嘅葛珮帆話，佢哋由西玩到北，再玩到落中部，足足玩咗十日。點知去到度假熱點開恩茲（Cairns）時遇上颱風來襲，佢本來以為所謂嘅超級颱風同香港嘅八號風球差唔多，所以暴風雨前夕，佢哋仲坐直升機，點知呢個超級颱風嘅威力真係好大，匿喺落地玻璃窗酒店房都驚到腳軟。
佢同老公最後應酒店呼籲，每人手執枕頭同被鋪落樓下嘅宴會廳同其他旅客一齊「大覺瞓」，連食物都要有限度配給添，今次澳洲行雖然加插走難經歷，好彩最後順利度過，趕得及回港過年。
葛珮帆同老公一致認為澳洲西部嘅雄鷹海灣（Eagle Bay）有如「夢幻海灘」，靚到暈！ （葛珮帆提供）
超強颱風殺到，酒店宴會廳變成避難所。 （葛珮帆提供）