政情：鐵頭仁普選圓夢始抱孫
白鴿黨主席何俊仁尋日同傳媒會面，講到新年願望時，佢好大體咁話希望早日有真普選，不過，聽真啲先知佢呢個願望原來既為公，亦為私。
鐵頭仁舊年嫁女，做咗外父嘅佢當時被問到想有普選定抱孫先？佢口快快話想要普選。事隔唔夠一年，鐵頭仁變咗心，希望快啲有個孫仔，點知囡囡話希望有普選後再生仔，搞到鐵頭仁唔知好嬲定好笑。
恨抱孫嘅鐵頭仁尋日見到人哋嘅BB時好興奮，又攬又抱，但佢雖然有三個仔女，湊BB卻並非熟手技工，佢仲自爆，當年湊仔只係識紙上談兵，一見BB喊就只會叫老婆，實戰經驗好少。